2. ad Petrum Medicem Maecenatem suum

Musa Fluentini, claudo licet anxia gressu,

      I, Maecenatis splendida tecta subi.

Dic modo qui misere poterat vix stridulus anser

      Exiguum rauco carmen hiare sono.

5

Iam liquidum niveis sublatus ad aethera plumis

      Sperat olorinos edere posse modos.

Nam quod Gorgonei non praebuit unda liquoris

      Olim nec Clarii laurea silva dei,

Hoc ego nunc hausi Tyrrheno e fonte profectus,

10

      Qui fluit e Medica lucida lympha petra.