Tifernate vaticinium cladis Italiae

Testo base di riferimento: V. Corbucci, 1935

Cura dell'edizione digitale: Barbara Zlobec


Barbara gens italos venit eversura penates:

      Et magnum a gelido panditur axe malum:

Venit et illa die saevo cum Cerva Leoni

      Cum secura Lupo conseret Agna latus;

5

Impia cessabunt tandem et civilia bella:

      In foribus cum iam fortior hostis erit.

Non petiit tantus nostras exercitus oras

      Intulit Ausoniae cum ferus arma Getes:

Nec cum Romanum properaret perdere nomen

10

      Annibal aut celsa gallus ab alpe ruens:

Vix avium tantas emittit bruma catervas:

      Cum mutata novo frigore torpet hyems:

Vix frondes tot sylva gerit, vix littus harenas

      Ionii tot habet Carpathiique maris:

15

Iam video totos impleri milite campos:

      Et pelagus structis classibus omne tegi.

Iam trepidare nova video formidine terras:

      Atque quati turres et tremere omne solum:

Heu quantas strages, heu quantas cerno rovinas:

20

      Iam tollent pulvis telaque missa diem:

Iamque sagittarum densa pugnabitur umbra.

      Letiferi tantus missilis imber adest.

Captivos pueros, captivas cerno puellas:

      Et captivorum ferrea vincla pedum:

25

Ignibus incendi sacras hostilibus aedes,

      Deque sinu matrum pignora parva trahi.

Sanguine torrentes, decurrent sanguine valles,

      Vsque adeo rabies Martis ira furit:

Scilicet Ausonios nunque diffusa per agros

30

      Huic par tempestas diluviumque fuit.

Foelices illi quibus has ne cernere clades,

      Neve pati possent, contingit ante mori:

O patria o tellus olim invictissima tu nunc

      Heu facinus, cunctis obvia praeda iaces.

35

Ve tibi quae septem claudis munimine colles:

      Et genus a Troia principiumque trahis:

Ve tibi desidia nimium luxuque fluenti:

      Ve tibi ter miserae, ve tibi Roma quater.

Hesperiae gentes civilia ponite bella:

40

      Et tantum a nobis hoc prohibete nefas,

Et vos o Veneti gentis tutela latinae;

      In quibus Europae est tota reposta salus:

Consulite in medium et vestras effundite vires:

      Non aberit caeptis talibus ipse deus.

45

Quid facis in tanto, Pastor Romane, periclo?

      Sollicitum totos quem decet esse dies:

Nonne vides quot regna ferox invaserit hostis,

      Nonne vides nostrae quantum minuantur opes;

Vt vigil incolumes populos tueris et urbes

50

      Cervici imposita est sarcina magna tuae.

Summe deus qui celsa colis fastigia coeli;

      Quo sine nec vires arma nec ulla valent:

Aspice nos, hostemque precor confunde furentem,

      Qui cladem Latio pernitiemque parat.