43. IN FLACCVM

Flacce, nimis nostro veteri debemus amori,

      Quo pariter nacti prima elementa sumus,

Quo pariter noti teneris et dulcibus annis

      Viximus aetatem contulimusque rudem.

5

Magna quidem vis est ineuntis, mira profecto,

      Aetatis, primi sedula sic habitus.

Quos etenim mores puerilis suscipit aetas,

      Perpetuos etiam grandior, aucta, tenet.

Te puer et, dicam paene, infans semper amavi,

10

      Hinc, quod te tantum vir modo factus amo.

Qui quondam primis noster praelusit ab annis,

      Idem Pieridum munere crescat amor.