1.

Acrius intuitur, raptim petit alta Iouisque

      Et tua sublimis, maxime Caesar, auis.

Et nunquam sola haec ignes sensisse uolucris

      Dicitur et magno fulmina missa Ioui.

5

Inclytus et uasti praeses dignissimus orbis

      Et tu cuncta uides summaque celsus habes.

Omnis in Augusto rerum prudentia regnat

      Et modus et recti iustus ubique tenor.

Vnus es inuictus, solus tu nomine dignus

10

      Caesareo, Caesar, solus ut astra petas.

Cum Ioue signa tibi sunt haec communia; namque

      Linquere cum uellet regna caduca pater,

Diuidit imperium: mundi permittit habenas,

      Arma simul leges et sacra iura tibi.

15

Diuidit imperium: patitur communia linqui

      Munera, quae meriti sint monumenta sui.

Postea desertis terris concessit in altum

      Et sibi suprema legit in arce locum.

Sed quia terrenis longe coelestia distant,

20

      Est illi uolucris uera, figura tibi.

Illuc, magne senex, longae post tempora uitae

      Ibis: adest inter sidera clara locus.

Nunc tibi mortali mortales dantur honores:

      Tum diuo in nostris tura Sabaea focis.