Nescio quo tenui sacrum modo carmine Dantem

Eloquar insignem studiis, quem celsa per orbem

Explicat eterno memorandum nomine virtus;

Nam postquam patrios Florencia seva penates

5

Linquere conspicuum iussit sine crimine civem,

Fortuna quatiente stetit, sortemque superbam

Excutiens semper misero securus in orbe

Vixit, et innumeros toleravit mente labores.

Ipse hominum rerumque patrem qui cuncta gubernat

10

Imperio et lati solus tenet aurea mundi

Lora manu, cui semper erit sine fine potestas,

Agnovit sine morte Deum, vitamque per omnem

Inpiger angustis operantia sidera terris,

Stelliferi secreta poli, quibus astra fruantur

15

Consiliis celo novit divinus ab alto:

Artibus ingenii redimitus acumine septem

Exhausit sacras musarum e fontibus undas.

Hinc sacris animatus aquis que dura cadentes

Premia dignoscant miseri, quibus ipsa salutem

20

Pena ferat sceleris, quos gratia collocet altis

Sedibus audaci cecinit sub tegmine cantu.

Scribere non possem viduas quot fletibus artes

Quotque novem musas lacrimis subiere dolores,

Cum rapuit mors seva virum; sed fama superstes

25

Gentibus extinctum memorat populumque per omnem

Vivet et eterno referetur laudibus evo.