Francesco Petrarca carmina, 39

Reference basis text: A. Hortis, 1874; K. Burdach, 1929; E. Pellegrin, 1955; G. Valentinelli, 1874; F. Novati, 1889; E. Bianchi, 1951; P. de Nolhac, 1907; G. Pizzamiglio, 1976; F. Pellegrini, 1895; G. Billanovich, 1988

Editing of the digital edition: Cristina Zanatta


39.

Vos quibus alta datur tractare negocia, patres

Consilii, firmate animos ac soluite diris

Pestibus; urentes odiorum extinguite flammas.

Nullus amicicie studium colat, iraque et ardens

5

Liuor et ultrices fugiant e pectore cure,

Affectusque cadant alii, stimulosque nocentes

Pellite in exilium, ne libera corda fatigent.

Cura sit in dubiis exanime cuncta salubri

Discutere in medium; nichil auricularia prosunt

10

Iudicia alterno tacite commissa susurro,

Ne decet in multas numerum distinguere partes;

Nec uagus hinc illinc abeat consultor; ad unum

State uiri, uariosque animi quos quisque profundo

Conceptus sub corde premit reserate sedentes.

15

Ingenio placet ista quies; placuere Minerue

Otia, tranquillas et amat sapientia sedes.