241. ad illustrissimum Michaelem Fuscarenum
dominum suum colendissimum
Nunc viget in terris summo pax cara Tonanti,
Detrusis rixis, copia et hic Cereris,
Iuliadum modo, lance aequa, ius dicitur oris,
Desertis viduis fertur et auxilium,
5
Praeside te felix igitur ter Iulia tellus,
Fuscarene, audit quem pater usque poli.
Fortunate heros, Venetum lux magna parentum,
Qui bene sic Vtinum, Iuliadasque regis,
Te Fuscarenum mea passim musa vocari
10
Miratur, lucem cum tua lux superet.
At Fuscarenus, ni fallor, dicere, non quod
Sis fuscus, fusca sed quia nocte micas.
Iure igitur laeta urbs Vtini, nam lucidus urbem
Felicem hanc reddis, cunctaque fusca fugas.
15
Lucifer est ausus, dira comitante caterva
Immensum contra bella movere Deum,
Hunc Michael, sancto coetu stipatus Olympo
Detrusit, socios et simul ense feros.
Tunc rex aetherius fidis iucunda ministris
20
Oscula, et his meritis praemia digna dedit.
Sic Michael praeses tibi maximus, optimus orbis
Conditor, haud dubites, munera multa dabit,
Tu quoque nam superas hunc contra tela ferentes,
Eicis immunes imperioque tuo.
25
Fortunati ambo, quibus hostes vincere fas est
Spernentes hominum, caelicolumque Patrem.