13. ad perillustrem et excellentissimum iurisconsultum et vatem
Faustinum Moisem dominum suum colendissimum

Te tua laetatur, veluti Verona Catullo,

      Patria et altiloquo Mantua Virgilio.

Vivere namque solent clarorum carmine vatum

      Vrbes, qui cedant marmora Pyrgotelis.

5

Hinc urbes certant de stirpe insignis Homeri

      Smyrna, Rhodos, Colophon, quattuor atque aliae.

Coelicolum Genitor tribuat tibi Nestoris annos,

      Denique et astrigeri regna beata Poli.

Vt Patriae, ut matri, genitricis prosis alumnis,

10

      Sideribus Patrem cernere avosque queas,

Aeternumque Deum, Divorum corda beantem

      Dicere cui grates fas erit innumeras.