Gian Domenico Cancianini odes 2, 5

5. ad Gasparem Cargam ode quinta

Mens scandit alte, nec tamen arduum

Tangis per ullos ingenii gradus,

Quid, Carga, sit, quo tamen repente

Totus amor tua corda fugit.

5

Et semper istud tu nimium stupes

In somnis, Haemo Thyas ut algido,

Matrisque Divorum Sacerdos,

Pinifera cum agitantur Ida.

Si me obsecrabis plus gemina vice,

10

Arcana dicam: solus ego scio

Sic esse iurabis per arcum,

Perque Dei aligeri pharetram.

Ille, ille (opinor, quem referam tenes)

Gygas minutus, corpore languido,

15

Qui affectat alti regna Coeli,

Seque putat nitidi amari

Passim puellis, ille Paphi Deam,

Cum matre et omnes ille Cupidines

Pellexit ad se, sic putavit,

20

Ludibrium Veneri, atque ludus.

Liquisset almam, prona Venus Cypron,

Gnidon, Cytherea et Cycladas et mare,

Quo nata, complexusque Martis,

Ne foret hoc procul a Theatro.