Pro serenissima familia Austriaca
Iupiter omnipotens summi moderator Olympi
Qui mare qui terras regis et Phlegetontia regna,
Tu mihi sis praesens nostris pater annue votis,
Vt domus Austriadum titulis sublimis et alta
5
Barbaricas acies semper gentemque rebellem
Comprimat et dira subvertat caede tyrannos
Et domus haec toto secli dignissima cursu
Vivat et imperii servet moderamina sceptri
Et Iovis hinc ales plaudentibus aethere pennis
10
Per mare per terras per totum pervolet orbem
Et caput imperii sacro diademate fulgens
Proferat et tandem media inter sidera condat.