1.

Discite quam lepide natura his lusit in undis,

      Qui magni aspicitis nobile vatis opus,

Vnguibus ille trucis iamdudum saucius Vrsae,

      Qua non Ausoniis pulchrior Vrsa iugis:

5

"Hoc - ait - abluero tandem mea vulnera fonte",

      Abluit atque novo vulnere tardus abit.

Hae lymphae extinguent incendia saeva bibenti,

      Hinc bibit et bibito corruit imbre iecur.

Hoc mihi pelletur sitis insatiabilis haustu,

10

      Haurit et humenti crevit in ore sitis.

Hoc spargam creber mihi lumina caeca liquore,

      Spargit et illa minus sparsa liquore vident.

O spes fallaces et amantum pectora vana,

      Saepe fluit morbus quaeritur unde salus.