125. ad Decium Serium, de Lucretia Tusca

Tusca pudicitiae renovans Lucretia nomen,

      Cum foret hostili praeda petita manu,

Praecipitat primum se se de culmine tecti,

      Ne laesus caderet virginitatis honos.

5

Atque ubi iam novit frustra cecidisse, propinqui

      Arni ponte ruit, nec pia mersit aqua.

"Ecquid" ait "poterone mori? Moriamur", et undis

      Obruit invictum terque, quaterque caput.

Cedat Seri igitur Tuscae Romana puellae:

10

      Vtraque casta, sed haec ter cadit, illa semel.