26. ad Nisam

Quas bona Flora rosas Paphiis modo legerat hortis,

      Excoluit tenera quas Cytherea manu,

Vberibus madidas lacrymis tibi mittit Amyntas,

      Ac simul his animam floribus implicitam.

5

Nisa cape: his poteris niveas ornare papillas,

      His poteris nitidas nectere Nisa comas.

Floris honos brevis est: brevis est quoque gloria formae;

      Dum licet, ah verno tempore disce frui.