24. ad Petrum Myrteum

Te consanguineum meum esse iactas,

Et hoc nomine gratiam aucuparis

Per urbes Italas; meique amici

Dant tibi hospitium, pecuniamque,

5

Quam statim male dissipas. Sed audi,

Mendax MYRTEE, cuius et parentes

Ignoro, et patriam, genusque; si tu

Vir frugi incipis esse temperansque,

Quin fias mihi filius, neposve

10

Non recuso equidem: sed esse pergis

Si nequam, et balatro impudens, caveto,

Ausis dicere te meum propinquum,

Ne laesa patientia furentem

Camoenam experiare. Num ferendum est,

15

Falso nomine te propinquitatis

Meae ad flagitia, et dolos abuti?