19.
Huc ades, o mea Lygda, parum decede calori,
Dum medio caeli Sol gravis orbe furit.
Nonne vides, ut tota fluas sudoribus? utque
Iam lassae nequeant stringere farra manus?
5
Hic patulae ramis sociant umbracula fagi,
Quas circum irriguis Mesulus errat aquis.
Nec salsae desunt oleae, nec olentia caepe,
Nec liba, aut veteri cymbia plena mero.
Huc ades: ardenti maneat sub Sole Nigella.
10
Te molles umbrae, candida Nympha, decent.