60. Turunda

Quis hoc credat? ego illa, quam comesse

Nec dites, neque pauperes solebant,

Quae solis avibus parabar esca,

Nunc lautis superum Turunda mensis

5

Acceptissima sum; nec ullus est iam

Qui non ambrosiae meum saporem

Longe praeferat. Ore quisque divum

Me vorat cupido, et canistra plena

Mensis terque quaterque fert iuventa;

10

Nec tamen satis est. Quid erudito,

Dicat forte aliquis, deum palato

Te gratam facit, o Turunda? nempe

BLOSI daedala Musa me lepore

Suo condit ita apte, et eleganter,

15

Vt quo plus edor, hoc magis magisque

Augescat studiumque, amorque edendi.

Quod ni caelicolas pudor vetaret;

Ab iis manderer usque, et usque, et usque:

Iunonique, Iovique, ceterisque

20

Dis magnis, mediocribus, pusillis

In manu forem, et ore continenter.