47. iocatur in Pygmalionem Formianum

Si villam mihi laeserit pusillam

Pagus, surripiens favos, merumve,

Aut pernas, oleumve, fictilesve

Vrnas, haud equidem deos rogabo,

5

Furum ut grandine rura verberentur,

Dum fruges gravidis tument aristis,

Nec lupi ut rapiant oves, sed unum hoc

Vindicem scelerum Iovem precabor,

Vt cum ducere coeperit colorem

10

Vva livida, mittat horum in agros

Dirum Pygmaliona, vinearum

Pestem, et Tartareo cane, et Charybdis

Hiatu horribili voraciorem.