Marco Antonio Flaminio carmina 1, 40

Reference basis text: M. Scorsone, 1993

Editing of the digital edition: Daniela Marrone


40. ad Horatium Gualterutium Caroli Filium

Alumne Musarum puer, tibi Thalia dulcis

Ab urbium frequentia remoto in antra Pindi,

Frondis corona myrteae caput decorum inumbrat,

Lyramque eburneam aureo docet ferire plectro;

5

Docet sonare vocula dulci melos suave,

Quo fluminum volubiles moratur illa cursus.

Non plus Marone parvulo canorus olim Apollo

Gaudebat: Orpheum parens non plus tenellum amabat.

O digne vita caelitum, tibi neant Sibyllae

10

Vivacis aevum innoxiae manus trium sororum.