22. ad Apollinem

Cynthii cultor nemoris, beatas

Voce qui Nymphas, citharaque mulces,

Phoebe, supremi Iovis, et deorum

Blanda voluptas,

5

Si tibi semper mea mens ab annis

Serviit primis, neque dulce cordi

Est meo quidquam sine te, precanti

Annue dexter.

Vt mihi optatum dat habere agellum

10

Clara Farnesi pietas, gravique

Liberans cura, iubet otiosam

Ducere vitam,

Sic tuo vati liceat, perenni

Nomen illius celebrare cantu;

15

Et viri in nostris vireat libellis

Gloria semper,

Myrtus ut luco viret in latenti,

Fonte quam nutrit liquido decora

Nais, et saevas hiemes, et aestus

20

Arcet iniquos.