Marco Antonio Flaminio carmina 1, 14

Reference basis text: M. Scorsone, 1993

Editing of the digital edition: Daniela Marrone


14. ad Bacchum

Age, Bacche, quis furor me rabidum occupat? io io

Rapior, et alta cursu volucri in nemora feror,

Vbi sacra Maenades cum trieterica celebrant,

Furibunda solent vagantes agitare tripudia.

5

Audire videor alto reboantia strepitu

Vbique aera: iam choris, iam videor nemorivagis

Celer interesse turmis. Evoe mihi sola sub

Pedibus tremunt, nubes evoe pulverea diem

Mihi tollit. Adest, adest iam Semeleia propius

10

Soboles: io venit, tinnula cymbala resonant,

Phrygiis recurva stridet grave tibia calamis.

Evoe vagus abit animus, evoe tremula flagris

Mihi terga quatit furor. Parce precor, precor, animum

Stimulis citare tantis: alios rape celeres

15

Per opaca Thraciae rura, alii capita rotent

Hinc et hinc reflexa, thyrsisque feras hederigeris

Lanient. In otiosis ego sacra latibulis

Faciam, aureisque Bacchi pia numina fidibus

Referam novus sacerdos. Tua, Liber, initia

20

Cantabo, et ista, donec mihi vita supererit,

Habitabo nemora, semper tuus, Evie, famulus.

Quod si bene, pater, Evantum me inserere choris

Animo est, et altae furibundum per iuga Rhodopes

Agitare, tuo mihi saltem munere liceat

25

Rabidi furorem amoris compescere, pater, et

Da servitio gravi dominae vivere vacuum.