1. ad Franciscum Turrianum patricium Veronensem

Ecce Flaminii tui libellum,

Candidissime Turriane, quem nos

Donamus tibi iure; quando nemo

Tantum nos amat, aut amavit umquam;

5

Neque hoc munere, quod mihi dederunt

Formosae manibus suis Camoenae,

Dum colo Aonios puer recessus,

Potest dignior ullus esse, quam tu;

Quem Phoebus pater, et novem sorores

10

Amant non minus ac suos ocellos.

At vos, numina cara, TVRRIANI

Famam cum lepido meo libello

Servate incolumem perenne in aevum.