16. epitaphium Cosmici
Hospes, siste parumper (hocque munus
Habe, et parva brevis morae repende
Damna), quod patris elegantiarum,
Romanae patris eruditionis,
5
Vides Cosmici Apolline et sororum
Vrnam Pieridum choro frequentem.
Sed munus tenue est, sed est pusillum,
Prae quod vate frui, manente vita,
Tam comi et lepido tibi fuisset.
10
Rursus nec tenue est nec est pusillum,
Cui non contigerit, manente vita,
Tam comi et lepido frui, videre
Saltem Cosmici Apolline et sororum
Vrnam Pieridum choro frequentem.