Girolamo Angeriano erotopaegnion, 21

Testo base di riferimento: A. M. Wilson, 1995

Cura dell'edizione digitale: Tiziana Brolli


21. ad Caeliam

Quid mihi, barbaricae si miscent proelia turmae,

      Maeret et ereptis Ausonis ora bonis?

Quid mihi si dira descendunt grandine nimbi,

      Vstulat et cultos Sirius acer agros?

5

Quid mihi si pereunt homines, armenta gregesque,

      Insidet et siccis faucibus atra fames?

Quid mihi si regnant reges, laudantur et ipsi,

      Vendit et elatos purpura lata duces?

Quid mihi si totus cum terra corruit aether,

10

      Sorbet et erectas mobilis unda domus?

Haec mihi cura: rosis et cingere tempora myrto,

      Et curas multo dilapidare mero.

Haec mihi cura: comas et barbam tingere suco

      Assyrio, et dulces continuare iocos.

15

Haec mihi cura: dies albo numerare lapillo,

      Lassaque composito membra fovere toro.

Haec mihi cura: novem cantu celebrare sorores,

      Dulciter et curvae plectra movere lyrae.

Haec mihi cura: tuas semper dicere laudes,

20

      O diva, et vultus semper amare tuos.