12. Hieronymo Martinicho

Artibus ingenuis, patriae lux clara iuventae,

      Gratulor. Ecce meo tempore Musa viget;

Ecce biceps nostra viget en Parnasus in urbe,

      Cumque Caballino flumine mons Helicon.

5

Amodo degeneres vocitet quis temporis annos

      Huius: habent magnum saecula nostra decus.

Carmina misisti, totiens ego missa relegi,

      Quae mihi, mellifluis condita nempe modis,

Quis neget Aonias Phoebo dictasse sorores

10

      Illa suo, Phoebum concrepuisse lyra.

Doctiloqui tibi sint curae oblectamina versus;

      Hos decet ingenio semper inesse tuo.

Tenditur ad superos studioso tramite calles,

      Palladia aetherius scanditur arte polus.