Daniele Fini carmina 24

Testo base di riferimento: S. Pasquazi, 1966

Cura dell'edizione digitale: M. Sartor, 2023


Ad Beatissimam Virginem Dei Matrem, cuius effigies in Castro Porti, ob miracula multa a multis in maximo cultu erat

 

Spes, tutela, Salus Porti, reserataque caeli

      Porta, procellosi portus et aura maris;

Siderei Regina poli, spes maxima mundi,

      Purior intacta candidiorque nive,

5

Ad te confugio, supplex tua numina posco,

      O Summi genitrix intemerata Dei;

Terra, fretumque tibi, magnus tibi militat orbis,

      Calcat avernalis pes tuus ora canis;

Pectore sol radiat, fronti stellata corona est,

10

      Splendida Virgineo sub pede Luna micat;

Et tibi quae terris, coeli dominaris et astris,

      Caelicolae parent, angelicique chori;

Labis et immundae, temerati et corporis expers,

      Suscipe non surda supplicis aure preces.

15

Mens sincera fuit semper candore pudico,

      Nulla fuit casto corpore menda tuo;

Sole fit illaesum vitrum penetrante, tuum sic

      Auctorem salva virginitate paris.

Concilias nobis mundi qui flectit habenas,

20

      Das aditum caeli, supplicibusque faves:

Tu tranquilla quies fessis, tu cassis inermi,

      Vnica tu miseris spesque salusque venis:

Dirigit in portum votivam navita puppim,

      Naufragio per te litora sospes habet.

25

Aeger inutilibus membris, et corpore languens

      Huc fertur, valido mox pede sanus abit.

Indefessa salus miseris, sacra virgula Iesse,

      Fer mihi, sum Daniel, integra Mater opem.

Laeta tibi sit frons emunctis nubibus exit

30

      Vt Sol, qui tectus nubibus ante fuit.

Nos hilari obtutu, placido nos inspice vultu

      Laetitiae prisco tempore qualis erat,

Quom tulit empyrea Gabriel delapsus ab arce

      Regis olympiaci nuntia iussa tibi;

35

Et tibi prolifico tumuit sine semine venter,

      Et paris illesa virginitate Deum;

Ad praesepe Magi stella duce solis ab ortu

      Dumque puerperio dona tulere tuo;

Dumque salutaris populorum, proditur infans

40

      Gloria, lux et spes a Simeone tuus.

Seu Styge devicta vivus de morte resurgit,

      Testatus partu numen inesse tuo;

Seu propria quom vi repetit caelestia regna,

      Discipulos Sanctus quom Paraclitus adit;

45

Exhibeas genitrix pia pectus et ubera nato,

      Ille cicatrices, flagra latusque patri;

Larga redundabit clementia caelitus, hinc te

      Praeside speramus regna subire poli.