Daniele Fini carmina 3

Testo base di riferimento: S. Pasquazi, 1966

Cura dell'edizione digitale: M. Sartor, 2023


Ad Divam Lucretiam Borgiam Ferrariae Ducem

 

Mitior exactis, qui nunc novus incipit annus,

      Itala pacifero tendat in arva pede.

Di tibi sint faciles, tibi sint et Nestoris anni,

      Sit testudineo lenta senecta gradu;

5

Faustaque sint dubiis successibus omnia, felix

      Sit coniunx, soboles sit diuturna tibi.

Solis ad occasus latum sit, solis ad ortun

      Imperium, pendens larga tributa tibi.

Barbarico populis regno dominere subactis,

10

      Et iuga nunc alia qui dicione ferunt;

Incolumis patria repetat formidinis expers

      Alphonsus, quem nunc Gallica regna tenent.

Viribus indomitis et vinci nescius ille

      Nativum servat robur et arma Patris.

15

Alcides genitor Nemeen si contudit, anne

      Degeneres natos progenuisse putas?

Fortuna famulante ferox fuit hostibus hostis;

      Alter Alexander, Caesar et alter erit;

Cuius in adventu rutilent fora compita flammis,

20

      Pendula templorum turribus aera sonent;

Horrisoni simulent tremebunda tonitrua bombi,

      Compedibus vinctus carcere liber eat.

Et procul hinc magna Procerum comitante caterva,

      Obvius occurrat natus uterque Patri;

25

(Tertius est bimus) mens est his una duobus,

      Vota eadem, stabilis mutuus aequus amor.

Mira recensebo, quamvis commenta putentur,

      Difficilis licet his sit tribuenda fides.

Est Procerum testis coetus, es, Borgia, testis,

30

      Ipse ego sum testis; mira sed acta canam:

Herculis undecimum qui nondum contigit annum,

      Praecinxit lauro Calliopea comam.

Materiam sumens ex tempore quamlibet ille

      Condidit aonia carmina digna chely;

35

Condita quin etiam quae dulcis epistola patri

      Redditur absenti, ceu Ciceronis erat.

Virgilii interpres et Caesaris explicat orsa;

      Par casus flectit nomina Graia suos;

Adde quod intrepida celer exprimit omnia fronte,

40

      Exit et augusto dulcis ab ore lepos.

Per fora, per vicos plaudens studiosa iuventus

      Docta Leonelli secla novantur, ait;

Di tibi dent annos, Pylii dent saecula; grandi

      Indole te numquam clarior ullus erit.

45

O, tibi quam debet Ferraria germine tali,

      Nobile virtutum Borgia diva decus.

Quanta tibi aeternae tribuit praeconia famae,

      A te quom supplex impetrat orbus opem!

Seu reus impubes, seu filia nubilis ad te

50

      Confugit, es miseris unica suffugium;

Callibus augustis seu clam qui quaerit asylum,

      Dum populi coetus horret et arma fori,

Sive Dicarcheo populis examine libras

      Iustitiam, procul hinc progrediente viro;

55

Borgia nec miseros eliminat, invenit aures

      Incola non surdas, advena, dives, inops:

Praesidium regale tuis das, Borgia, servis,

      Me quoque quos inter connumerare velis.

Si libet, ingemines operosa negotia nobis,

60

      Vt mihi fautricem te fore quisque putet.

Nam licet hic vigili tutelam Caesaris astu,

      Principis hic alius vindicet, ille Ducis,

Pontificis raris hic et virtutibus, alter

      Cardinei longa sedulitate chori,

65

Attamen hic tecti fert haec insignia pinnis,

      Indicet ut cunctis grande patrocinium.

Sphaericus eructat triplices globus impete flammas

      Borgius et bos hic fulgurat igne poli.

Albentes aquilas, et gallica lilia cinctu

70

      Serrato, Hippoliti coccinus umbrat apex;

Nigricat alituum princeps invictus; honorat

      Stemmate bis trino sacra tiara pilas.

Hic adamanta sagis insignit Belliger; ille

      Crus geminum panno multicolore tegit.

75

Ferre supervacuum pinnis, et tegmine duxi,

      Quem fero puniceum, Borgia, corde bovem.

Dent tibi, dent natis, dent prospera secla marito,

      Dent populis superi cuncta secunda tuis.