Daniele Fini carmina 2

Testo base di riferimento: S. Pasquazi, 1966

Cura dell'edizione digitale: M. Sartor, 2023


Eidem

 

Reddita Pictori triplici mihi foenore messis

      Semine nostra mage est multiplicata seges;

Sic agit evitans ingrati nomen Amicus,

      Sic solet a simpla dupla redire charis.

5

Attamen in laudes moderantius utere versu;

      Non mea Bistoniae est anteferenda chelys;

Sedula quam circum suspendit Aranea casses

      Multiplici hinc tela semisepulta silet.

Conticet et siluit tineis exesa tot annos,

10

      Turbida pacifero ceu fora iustitio.

Audisti nostrae diuturna silentia Musae;

      Ast ea cur longo pressa labore, canam.

Me labor exactis bis denis publicus annis,

      Funditus oppressit, sollicitatque magis:

15

Aggeribus ruptis spumoso gurgite quando

      Stagnat arenosus lata per arva Padus.

Qua modo puppis iter nunc orbita flumine signat,

      Illius astricto quom riget unda gelu;

Nunc celeri populos vexant contagia fato,

20

      Indiga nunc Cereris vexat acerba fames;

Mox iterat, solito tenditque valentior arcus,

      Dum fugit infecta civis ab urbe, lues.

Ferrea nunc patrii surgunt munimina valli,

      E quibus admoto proruat igne silex;

25

Nunc datur, ingenti gaudent quae strage catervis

      Insatiabilibus copia larga cibi.

Pervigil urbanis igitur custodia portis;

      Sternuntur turres, moenia, templa, domus;

Militibus dantur nunc strata domestica multis,

30

      Tecta cataphractis nunc stabula alta feris;

Incola belligeros stramen partitur in omnes,

      Ligna in scelestos, in vigilumque focos;

Nunc data sunt validis hastilia civibus, et mox

      Cuncta suburbanis martia tela viris,

35

Serica vicorum Praefectis signa, boantes

      Quaeque cient gemina tympana fronte sonos;

Et renovata molunt Cererem pistrina per Vrbem,

      Pluraque difficili structa magisterio.

Suppositis pontes vult nunc exercitus alvis,

40

      Impete fulmineo marmora quodque fugat;

Nunc pons inferior, nunc scamna scholastica fiunt,

      Saepius et vecta est huc aliunde Ceres.

Et murus struitur, siccata fluminis unda,

      Et fossae totiens evacuantur aquis;

45

Mox exusta prius tenebris ergastula caecis,

      Mox sunt clamosi tecta novata fori;

(Testis Alexander), superi longissima pontis

      Nunc et ab externis tigna vehuntur agris;

(Castalii nam fontis honos interfuit ipse,

50

      Qui patrem et celebrem mox superabit avum).

Singula si referam, referenti lingua fatiscet,

      Scribenti nec erit plurima charta satis.

Costabilis iussu Antoni, cui Patria curae est,

      Qui patriae merito dicitur esse pater,

55

Iuppiter ex istis onerosa negotia curo,

      Nec praevisa mihi munia plura fero.

His sine, servato procedunt ordine multa,

      Quae mea praegrandi pondere terga premunt:

Intolerabilibus tam saepe laboribus acta

60

      Dedidicit numeros desidiosa chelys

Talia si vires adimunt operosa Camenis,

      Nil mirum a Musis abstinuisse diu:

Ingenio stimuli tua sunt epigrammata nostro,

      Tu resides cordas, plectraque tarda moves;

65

Scribere ni cesses, nostro de pectore tolles

      Scabritiem; assiduis pellitur ira modis;

Tu mihi, ceu magnes, tibi ferreus anulus unus

      Si trahitur, sequitur tota catena. Vale.