Ad Ferdinandum Regem

 

Dum varias dubio versarem pectore curas

      Et quae nunc latia bella gerantur humo,

Quid faciant Veneti ventosa per aequora fortes,

      Quid struat anguigeri provida cura Ducis,

5

Quid Caesar, quid Roma potens, quid regis Hiberi

      Agmina, quid Turcus Pannoniusque ferox,

Versetur quantis Ferraria nostra periclis

      Vt paene hostili capta sit illa manu,

Vrbanos liqui coetus bellique furores,

10

      Et petii Musis rura benigna meis.

Obvia facta mihi est mediis Venus anxia campis:

      Agnovi pulchrae protinus ora deae.

Dextra faces habuit, laceris dea moesta capillis

      Flevit et est tali pauca locuta sono:

15

"Dic age, quid viridi iuvenis meditaris in umbra?

      Quid facis in solis incomitatus agris?

Grandisonone paras describere bella cothurno?

      Factaque magnanimum non moritura ducum?

Differ opus; Regi Ferinando mitte tabellas

20

      Qui studet Ausoniis addere rebus opem.

Dic petat oppressam crudeli milite Cyprum;

      Ducat et armatas per freta longa manus.

Me Venetum infestant acies populantur et urunt;

      Odit caelestes impia turba deos.

25

Illa meum ridet numen; subtraxit amori

      Flammigeros arcus, aurea tela, faces.

Adde quod infandis tribuit loca nostra cynedis

      Foemineumque procul iussit abire genus.

Aurea cingebat quae nostra palatia saepes

30

      Corruit et saevo diruta Marte iacet.

Semper erat nobis placidi indulgentia veris;

      Et nunc perpetuo frigore turpis hyems.

Iam meus Eois fragrabat odoribus hortus;

      Nunc riget et spinis squallidus horret ager.

35

Corruptos sileo fontes et mixta venenis

      Quae quondam nivei flumina lactis erant".

His dictis tacuit celerique per aera curru

      Fugit et est superas scandere visa domos.

Scribimus haec igitur regum tibi summe, nec ista

40

      Fingi, sed Veneris verba fuisse putes.

I, cito solve rates, placidae pete litora Cypri:

      Expectat classes insula maesta tuas.

Ipsa Venus, molli natorum cincta corona,

      Diriget in medio vela secunda mari.

45

Iura dat aequoribus, ventos immittit et arcet,

      Nec non spumoso dicitur orta mari.

Praebuit illa tibi faciles in amore puellas

      Pignoraque et pulchra coniuge pulchra dedit.

Testis adest divi lumen Lianora decoris,

50

      Quae non foemineum foemina pectus habet.

Pannonioque probat regi coniuncta Beatrix,

      Donavit faciem cui Cytherea suam.

Non opus est nitidos Federici dicere vultus:

      Talis Hylas, talis Parthenopaeus erat.

55

Quid referam Alphonsum viridi, qui maximus aevo

      Nil nisi magna facit, nil iuvenile sapit?

Hunc modo martigenae timuerunt moenia Romae;

      Invictum tellus sensit Etrusca Ducem.

Expulit hic fortes Calabro de litore Turcas

60

      Pellere quos Venetae non potuere manus.

Hoc duce prosternes fastus gentesque superbas;

      Finis erit regni terra Britanna tui.

India mittet ebur, dites Panchaia ramos,

      Lucentes gemmas aequora rubra dabunt.

65

Illa erit, illa dies nostris cantanda Camoenis

      Et Phoebo et sacri concelebranda sonis.

Cernere qua possim Cypri de rupe puellas

      Ducere festivos laeta per arva sonos.

Teque super currus redimitum tempora lauro

70

      Solvere Tarpeio debita vota Iovi.

Captivique duces et regum pompa sequetur

      Magnaque servili subdita turba iugo.

Tunc amor incipiet totas volitare per urbes

      Et feritas saevis desinet esse feris.

75

Arboribus ludent volucres et in aequore pisces,

      Ludent mansuetae per nemus omne ferae;

Et quodcumque genus Veneris creat alma voluptas

      Debebit meritis, Rex memorande, tuis.