Quaedam puella conqueritur de morte patris et mariti

Lux eadem rapuit patrem, rapuitque maritum;

      Deseror infelix, orba parente, viro

Cur non tres rapuit? Quanto felicior esset

      Sors mea, sors cunctis anteferenda malis!

5

Adde quod externo mihi raptus uterque sub axe est;

      Nulla dedi patri basia, nulla viro.

Non potui sparsis solito de more capillis

      Flere, nec ad tristes munera ferre rogos.

Non gelidas tractare manus, non ossa sepulcro

10

      Condere, non alta dicere voce: vale.

Vrbinum tegit ossa patris, tenet ossa mariti

      Roma: utinam cineres claudat et illa meos!

Quid moror? Vlterius vivo? Mihi demite vitam;

      Vita mihi mors est, sunt mea vota mori.

15

Fata inimica vetant, cupidam mors impia spernit:

      Heu heu quam miseros tollere surda negat!

Si pietas animis coelestibus ulla fuisset,

      Debueram subito victa dolore mori.