21. ad Chrysillam:
eam esse caeteris virginibus exemplar
quod ipsae sequantur

Micare sicui non videntur sydera,

Nitere nec Phoebi soror,

Forsan nec illi Phoebus ipse fulserit,

Per quem renident omnia.

5

Cui tu venustis non videris moribus

Ornata supra caeteras,

Hic non, Chrysilla, quid modus sit, quid pudor,

Nec quid venustas noverit.

Exemplar esse ne moreris omnibus,

10

Nec se morentur caeterae,

Quin te sequantur eminens coelestium

Munus datum mortalibus.

Vt una coelo graditur e tribus dea

Quae Paride praestat iudice,

15

Illamque divae circuunt, volentibus

Iunone sic et Pallade,

Sic multa te sequentium semper cohors

Circunferatur virginum,

Decusque de te tale faustum contrahant,

20

E Venere quale sydera.