Angelo Poliziano elegiae 1

Testo base di riferimento: I. Del Lungo, 1867

Cura dell'edizione digitale: Federica Giacomin


Ad Laurentium Medicem.
commendat praeceptorem Andronicum

 

Ipse canenda geris, Laurens, nos gesta canemus;

      Hei mihi, sed nostro est parvus in ore sonus!

Exsuperat teneras, Medicos, tua gloria vires,

      Nostraque materiam carmine musa premit.

5

At tenerae crescent vires crescentibus annis,

      Exiguusque meo crescet in ore sonus.

Tum liceat nomen fama tibi ferre per aevum

      Et tua non humili gesta sonare tuba.

Tu tantum Andronicum serves! O quantus ab illo

10

      Spiritus in nostri pectoris ima venit!

O quos ille tibi gignit nutritque poetas,

      Dum tonat argolicis troica bella modis!

Iam tibi Aristotelem vertit, penitusque retrusas

      Naturae arcano concinit ore vices.

15

Vnica materies illi es, spes unica solus;

      Vna illi vitam tu dare voce potes.

Parva petit, dare magna soles; da parva petenti:

      Parva tamen nescis si dare, magna dato.