Giovanni Aurelio Augurelli carminum libri 2, 15

15. ad Ioannem Regium

Saepius, Regi, veneratus aequa

Mente coelestes precor, ut benignum

Hunc diu vobis dominum secundo

Sydere servent,

5

Mox ut illius meritis honores

Debitos spectent semel, et fideli

Lancis aequatae trutina laborum

Praemia librent.

Nam quis, ut nosti, melius tot annos

10

Res piae tantas fidei peregit,

Dum Patris Summi venetas ad oras

Nomine degit?

Mitto quot Romae varia negocii

Sorte distractus tulerit referre,

15

Sive quae quondam residens Hiberis

Vrbibus egit.

Et tamen cessant homines benigne

Quae satis nunquam valeant merenti

Reddere, ingratum genus atque iniqua

20

Mente ferendum.

Auguror sed iam prope tempus esse,

Si movet veris mihi Phoebus ora,

Quo morae hos tantae pudeat iuvetque

Damna rependi.

25

Nanque iam pastor sapiens propinquat

Qui, sacro longe removens ovili

Desides, large pecus omne pascet

Frugiferentum.