Giovanni Aurelio Augurelli carminum libri 2, 9

9. ad semet adhortatio

Perge, quid cessas? Patet hoc aperte

Protinus cunctis iter, ut volentes

Imus et nosmet properamus aequo

Sistere campo.

5

Atque si moles prius obstet ulla

Quominus iam tum videaris apte

Ingredi, ne tu tamen abstineto

Promptius ire.

Hanc enim mox cum superaris, illhuc

10

Veneris quo non alius patescit

Planior nobis locus atque callis

Latior ullus,

Qua per apricum nemorum vireta

Perque florentum medios odores

15

Laetus ad sedes superum beatas

Leniter ibis.

Nam semel pressis et humi relictis

Noxiis curis, erit aequa posthac,

Quae tibi forsan poterat videri

20

Ardua, virtus:

Vna quae cunctos aditus recludit

Asperos nobis facilesque reddit,

Quaeve mortales super astra prorsus

Vna reponit.