Giovanni Aurelio Augurelli carminum libri 1, 26

26. ad Musam

Musa, iam tecum satis hunc in annum

Lusimus grata vacui Camoena;

Quin parum cessas tenuesque nervos,

Diva, remittis,

5

Dum graves imus Danaum per artes

Qua pedem docti veteres tulerunt?

Tam simul parvis humeris nequimus

Cuncta subire.

Inde mox largis opibus priorum

10

Forsitan mecum gravior redibis,

Cum tibi Graio varius nitescet

Barbitus auro.