Convenevole da Prato regia carmina ad Robertum Andecauensem, 61

61.

Prorsus amore Dei sic ardeo sicut et aurum;

Cordis flamma mei prout ignibus urere laurum

Magna solet (mira res!) inconbusta vigere

Vt rubus, et dira non est: maneo micchi vere:

5

Sentio fervorem, spargo redolenter odorem;

Non mea curo, Dei vel grata Sue faciei;

Curo confutem, per amorem velle salutem,

Infirmos cordis vel turpi vulnere sordis.

Nil ago perverse, non emulor, haud gero ficte

10

Ac anime merse culpis vel sentibus icte;

Compatior dulcis sotiis sum seu peregrinis,

Et spatior sulcis pietatis et obsto ruinis,

Tutor et insontes, celo crimen miserorum,

Arguo torpentes clementi voce bonorum,

15

Solor et afflictos et sedo pace furentes,

Ad verum fictos nitor revocare sinentes.

Quisquis nempe caret me nicchil habet, nicchil ergo

Est; stipulis aret similis. Modo carmina vergo;

Cum puris tumba moror una; leta, faceta

20

Horum secreta sum candida iure columba;

Et cum versutis gero prudenter comitivam,

Quamvis convivam patiar me iure salutis.

Sum soror humani generis nutrixque fidelis;

Nulli crudelis dulcoris do bona sani.

25

Diligo ferventes ferventius igne; teneri

Tunc reputo veri quod amici sint recolentes.

Non turbor bellis, carnis velut anxietate,

Aut infestate languoribus atque procellis .

Parco vel ignaris vel ut ignotis: veniarum

30

Non personarum manet in me lectio naris.

Nec discerno viros qui sint venia meliores,

Vel plures mores habeant, vel crimine diros,

Et precor ut mictat lumen Deus hiis radiorum

Perpetratorum scelerum virusque remictat.

35

Qui mage pacis egent, veniam festinor, <et> illis

Do numerum villis, solaminis addo veracis.

Non eget is medico qui sanus scitur iniquus

Conscius; obliquus eget auxilii, set amico.

Omnibus ut sospes sit quilibet obligor hospes.

40

Ne perdant salmam, cunctis opis offero palmam.

Pando meum mantum venientibus, est sibi quantum

Vtilis; et poma Tibi, que dedit inclita Roma,

Factor celestis, resero: fugit ac fera pestis

Invidie, quare Christum velit omnis amare.