41. ad Franciscum Quirinum

Musa iocosa mihi est, mihi vita iocosa, Quirine,

      Dant quoque fatales fila iocosa Deae.

Non Tartesiaco pectus mihi carpitur auro,

      Nec peto Campani iugera mille soli.

5

Sit mihi parva domus, nox ebria, fidus amicus,

      Gratus ager, simplex et sine labe toga.

Me Cyathi, ludi, choreae, rosa, tympana, cantus,

      Me Venus, et Bromius, me trahit alma Ceres.

Quod Phlegetontaeis remeet si Brutus ab undis

10

      Clamabit: sic mors vivere nos docuit.