77. Marco Antonio Mauroceno

Maurocene, favet posita cui Gorgone Pallas,

      Cui iam se totum pulcher Apollo dedit,

Si pia delectant iuris te foedera sancti,

      Candida si patrii diligis acta fori,

5

Regia tecta petas ubi dux solet atque senatus

      Romuleo leges composuisse modo,

Et quaesitorum subsellia maximus inter

      Dic, age, quod laudet Romulus atque Numa:

"Tam cito fas non est causas cognoscere, non est

10

      Fas capitis poenae tam cito ferre manum.

Saepius insontem verbis accusat iniquis

      Improbus, innocuos dilaceratque viros.

Gignit abortivos excusso pectore foetus

      Foemina, legitimam quae parit ante diem;

15

Saepe cadit celeri properat qui currere passu,

      Cogitur et media saepe iacere via.

Qui bonus est iudex geminas examine lances

      Dirigit aequata sublevat atque manu".

Audiet Augustus si talia forte, rogabit

20

      Vt tua non damnent dicta verenda patres.

"Non possum certe", dices mihi. Maximus ipse

      Sed cum sis Marcus, maxima, Marce, potes.