Feretus Vincentinus sociis et amicis carissimis ut inveniant sibi uxorem
Num mea solliciti tangit vos cura sodalis
Volventis viduo frigida membra toro?
Legitimis sua quemque fovet complexibus uxor,
Tunc lasciva movet dulcia bella Venus,
5
At sua cui quondam mandavit signa Diones,
Cogor inoptata nunc ego pace frui.
Arguor infelix quod sit mihi debile membrum
Nec valeat dulci fonte rigare caput
Quodque... Mihi num est caris de testibus alter,
10
Non iacet inque meo grata puella sinu?
Est mihi, sitque precor, rubicundus fronte Priapus
Et cornu, cum vult, durius ipse tumet
Et sibi sunt placidi socii certaminis ambo,
Plenaque lac sicut ubera, nectar habent;
15
Seque libens, medio quociens in gurgite mergit,
Prebet et alternos captat abinde favos.
Vos igitur causam, comites, defendite nostram
Cum sine, iam scitis, crimine vera loquar,
Si foret et magnos opus hic adiungite divos
20
Nec detur talamis fama maligna meis;
Si qua tamen verbis volet his diffidere, factis
Credat et ex tactu certa sit ipsa suo.
Tot mihi dilecti si qua est pia cura sodalis,
Pervigilet pro me cetera quisque sinens,
25
Vt mihi que sevum detur nova nupta calorem
Leniat interius esteriusque zelu.
Quisque per exiguam sua retia callidus urbem
Tendat et ingeniis, turba, fruare tuis.
Incidat in laqueum casta et formosa puella,
30
Parva ferens gremio candida poma suo,
Virgo nec alterius mores induta mariti,
Quas deceat solidas hec mihi tradat opes
Nec cadat in laqueum, nisi que sit lucida vobis:
Non placeat, nisi quam forma placere facit.
35
Vndique tunc celeber cunctis cantabitur imen,
Festivosque dies lupia parva cholet.
Est opus ut, munde vivens, me coniuge iungam
Fataque dent tepido membra fovenda sinu,
Auspiciis faveant tantum mihi numina iustis
40
Propellatque rates aura secunda meas,
Nubila si gelidas vexantes equoris undas
Concipiant ventos quos mea vela timent.
Altera sed suadet cunctorum obiecta voluptas:
Non exploratis lintea danda notis.
45
Quid timeat cupiatque simul mens ansia curis
Auribus accipias rite, poeta, tuis.
Ergo, precor tremule capias retinacula puppis
Et teneat portus ancora fixa suos,
Dirige consiliis animum cunctantis amici,
50
Faucibus ut melior defluat unda meis.
At si forte tuo laudabis pocula prima
Iudicio et placidi vina saporis erunt,
Non tamen in tacita remanet mens lassa quiete,
Altera sed gravior plaga renata viget
55
Quam mihi de multis sociali federe iungam
Queve libens nostro nupta futura toro.
An mea virgineum corumpent inguina florem,
Aut veniet gremio nupta secunda meo?
Publicus aut ortam generoso sanguine tollam
60
Aut humilis tepido stabit amica sinu,
Pauperis aut Helene contentus dote manebo,
Rustica vel saciet docte superba torum?
Talibus atque aliis vigili mea lumina sompno
Languida nocturno tempore cura domat.
65
Altera maior adest ratio, quod libera fastus
Emineos numquam subdita colla timent.
Dum mea Cimbriacam vaga mens it sepe per urbem,
Pauca verecundi castra pudoris adit
Nec tamen id mirum est, nam plurimus advena nostris
70
Menibus incassum retia nulla trahit.
Hec satis: haut opus est verbo seu cetera versu
Edere nec placido plura referre viro.
Expertus tociens Polidarius inguina nostra
Vulneris experto talia cedat acu.
75
Vtile quicquid erit victuraque pocula morbo
Scribas discipulo cuncta, poeta, tuo.