16a. Epitaphium Malatestae Carbonesii

Qui forma puerum Maronianum

Et Phoebum superabat et Liaeum,

Qui forma poterat puer videri

Ideus, fieri Iovis minister,

5

De cuius manibus Tonantis uxor

Hausisset dea poculum libenter,

Quem Pallas cuperet libens maritum,

Pro quo iam Cybele dedisset Atym

Et Myrrhae sobolem Venus decoram,

10

Omnes cui cuperent placere nuptae,

Omnis quem cuperet puella sponsum:

Heu! fato Malatesta raptus atro

Carbonesius hoc iacet sepulchro

Extinctus viridi miser iuventa

15

Lustris quattuor, heu nefas!, peractis.

Hos cum versiculos leges, viator,

Effusis lachrymis genas rigato.