22. de quodam amico Galle
Audio te durum sentire Cupidinis arcum,
Vreris et ceco vulnere torquet amor.
Galla tuas nimium mordet lasciva medullas
Inque tuo semper corde puella sedet.
5
Saepe tue carmen tenerum componis amice
Et mulces dominam carmine saepe tuam,
Littoreamque ferunt Veneris tua tempora myrtum,
Aspirat facibus blanda columba tuis.
Carmine tu facies notam per soecula Gallam
10
Vt Nemesim condam, culte Tibulle, tuam.
Cinthya iam toto cantatur in orbe Properti
Nosceturque ignis, Galla superba, tuus.