75. ad Rubertum Vrsum Ariminensem iureconsultum nobilem

Vrse, quod affirmas raptum tibi iure videri

      Marsilium, Paulus dum canit ut rapitur,

Sydera dum scribit quae mens habitatque tenetque

      Splendida, caelestes quis regat arte domos,

5

Sentio quod sentis, cum sit divinitus illi

      Ingenium mira de Iove sorte datum.

Sed tamen hoc addo: si raptus in astra sit ille,

      Vt canis, egregium quo meditetur opus,

Te quoque Pieridas vatem rapuisse puellas,

10

      Dum facis Aonio carmina digna choro.