9. cur non ita frequenter visat Laurentium Medicen
ut antea consuerit
In te summus amor cum sic mihi crescat in horas,
Maius ut hoc, Medices, nil reperire queas,
Cur tamen hinc ego te visam minus, accipe causam,
Nec nisi vera puta quae tibi verba feram:
5
Numen inest oculis, hominem sonat inde nec ipsum
Vox tua, perpetuis aequiperanda deis,
Vnde fit ut nequeam, cum sim mortalis, honores
Ferre novos, superi quos tribuere tibi.
Sic ego quod cupio fugio tamen, ire nec ausim
10
Huc, ubi sunt Medicae numina magna domus.