31. ad Laurentium Medicen de adventu
Elionorae regis Apuliae filiae

Aeneam velut Anchises Simoentis ad undam

      Protulit, unde Phrygum surgat in astra genus,

Vt domus Aeneadum Latias penetraret in oras,

      Conderet atque tuos longior, Alba, Lares,

5

Sic hos divina Medices sibi sorte penates

      Cosmus inauratos condidit ante pater,

Vt genus inde suum Tuscas bene temperet urbes

      Legibus et patrias ut regat arte domos

Vtque sit hospitium regum strips tanta novorum,

10

      Vt domus haec ducibus sit decus una bonis.

Iulius hinc rursus Medica viget alter in aede,

      Nomina qui referat, pulcher Iule, tua.

Hinc rursus lauri silvam Laurentius heros

      Plantat, ut haec ramos tendat in astra suos,

15

Quae tamen in nullum iam desinat inde Neronem,

      Dum malus in scelerum rex genus omne ruit,

Sed quae perpetuos vireat mansura per annos,

      Laurenti, Tuscae dum pater urbis eris,

Dum genus Etrusca perstabit in arce tuorum,

20

      Dum dabit et patriae candida iura tuae.