Naldo Naldi elegiae ad Laurentium Medicen 3, 17

Testo base di riferimento: L. Juhász, 1934

Cura dell'edizione digitale: F. Boschetti


17. ad Petrum Medicen de spe in eum concepta

Mos erat in Latio, populus cum victor ab hoste

      Romuleus niveis ibat eburnus equis,

Vrbs Romana novos ductans cum laeta triumphos

      Vidit honoratos inter et arma duces,

5

Vt quoque diversis Latia virtutibus urbe

      Numinibus veluti templa dicata forent.

Hinc Titus et Paci, rediit cum victor ab hoste,

      Condiderat spoliis templa decora novis.

Romae cultus Honos, Victoria culta, sed illis

10

      A duce Marcello templa duobus erant.

Cana Fides aris albo circundata panno

      Ipsa suis prisco tempore culta fuit.

Ah quotiens populus, saevum, Romanus, in hostem

      Dum fertur, votis spem vocat ante suis.

15

Ah, quotiens victor rediens nova sacra piavit,

      Spes, sibi quod per te vota secunda forent.

Haec diversa locis, haec aurea templa per urbem

      Sunt quoque diversis condita numinibus.

At Medices summas dum rerum tractat habenas,

20

      Dum Petrus Etruscos temperat arte Lares,

Omnibus eduxit templum virtutibus unum,

      Quod, nisi me fallit, stat tibi, Petre, domi.

Hic aris sumit positis libamina prima,

      Quae dea de superis dicitur Erigone.

25

Aurea divinis nec non Concordia votis

      Praecipue, Medices, est, Petre, culta tibi.

Quid sacra nunc referam, patria quot sede litasti,

      Vt Pax Etruscas visat amica domos?

A te Spes certis etiam certissima signis

30

      Creditur, o Medices, in tua sacra coli.

Hinc est, quod cunctos sequor hanc ego laetus in annos

      Pollicitis fisus tempus in omne suis.

Vt reliquae quoniam solidae celebrantur in aevum

      Virtutes Medicis, sacra pianda, focis,

35

Sic quoque sic posito viridi de marmore templo

      In Medica colitur Spes dea certa domo.