2. ad librum

Postquam, parve liber, properas vitare latebras

      Et cupis in lucem protinus ire novam,

I modo, sed, tutos si vis habitare penates,

      I, liber, i, magnos expete, parve, Lares,

5

Hic tu semper eris cunctos quia tutus in annos

      Tutaque debilitas hic tua semper erit.

Hoc tibi praestabit Medices Laurentius, est qui

      Civibus una salus, qui decus omne, suis.

Nanque, ubi te sumet vultu bonus ille sereno,

10

      Vt legat indoctas, parve libelle, manus,

Nusquam te caries morsu corrodet acuto,

      Nusquam longa dies eviolare queat,

Non tibi non imber, non et Iovis ira nocebit,

      Fulmine cuncta licet corruat ille suo.

15

Sic tu peste, liber, vives securus ab omni,

      Etruscae Medices dum pater urbis erit.