Luca Ripa carmina 2

Testo base di riferimento: S. Pasquazi, 1966

Cura dell'edizione digitale: M. Sartor, 2023


Lucas Ripa Lodovico Pictorio salutem

 

Hactenus in teneris lusisti candide vates

      Carmine saepe iuvans pectora nostra tuo.

Ingenii vires creverunt crevit et aetas;

      Extulit ex humili nunc quoque Musa caput.

5

Eia age facta igitur regum celebranda ducumque.

      Aggredere, ut magnus hinc tibi surgat honos.

Surget honos equidem nec praemia parva sequentur:

      In pretio virtus semper ubique fuit.

Hoc ego consilium quod fida mente recludo

10

      Sectarer, mihi si vena benigna foret.

Ast parte in laeva sanguis tepet, otia nec sunt

      Qualia Virgilio Roma superba dedit.

Sed tu quem vatem celebrant epigrammata mille,

      Grandia grandisono carmina funde pede.

15

Dices forte: alii nil concessere futuris

      Vatibus; unde igitur fortia facta petam?

Mirabor si non dabitur tibi copia rerum

      Maxima quas cantet Calliopea potens.

Campus erit quo currat equus qui dura lupatis

20

      Praebuit ora tuis imperioque tuo.

Carmina plura darem sineret modo torrida febris,

      Quam vocat assidue tertia quaeque dies. Vale.