Luca Ripa carmina 1

Reference basis text: S. Pasquazi, 1966

Editing of the digital edition: M. Sartor, 2023


Lucas Ripa vates Lodovico Pictorio salutem

 

Quid dubitas, Lodovice, refer, pavidoque gelaris

      Pectore, nec requies artubus ulla datur.

Non ego iampridem vidi quod carmine posses?

      Ingenii vires non ego nosco tui?

5

Sed fortasse meum magni fecisse negabis,

      Inditium imponat ne tibi Musa loquax.

Hoc Baptista meus, tuus hoc Baptista Guarinus

      Viderit, eloquio carminibusque potens,

Cui dedit eximium decus ars celebrata legendi

10

      Nota urbi et populis iam bene nota feris.

Fidus adest quem tu merito veneraris adoras

      Castellus, celebrem quem medicina facit.

Nec nimis ingenue decorant hunc Palladis artes,

      Et vatum quicquid tempora nostra colunt.

15

Abstrusas rerum causas disquirit et omnis

      Socraticos nexus addocet usque bonus.

Sentit idem Carbo quem carum tanta facultas

      Dicendi magnis regibus esse dedit.

Experiare licet graviorum pondera rerum

20

      Carmine grandiloquo quae tua Musa canat.

Experiare licet, moneant modo lumina nostrae

      Haec tua grata urbi consilioque iuvent. Vale.