Hieronymo Lauredano Laurentii filio
Anulus hic, nostri, Hieronyme, pignus amoris
Semper erit digito qui micat ecce meo:
Nam superat quicquid dives Pactolus in aequor
Quicquid et auriferi volvit arena Tagi.
5
Hunc nec Erythreis (vis credere?) comparo conchis,
Nec Darei forulo, nec tibi, gemma Gygis.
At ego quid contra tibi, Lauredane, rependam?
Munere, pro tanto vix satis unus ero:
Delia sola tibi dignas persolvere grates
10
Carminibus poterit facta beata meis.