Libello suo

Parve liber, totum felix volitabis in orbem

      Gestabitque suo te Cytherea sinu:

Ipse Cupido tibi violas, opobalsama, nectar,

      Oscula, delitias ambrosiamque dabit.

5

Nulla puella tuas cupiet non noscere chartas,

      Negliget et qui te nullus amator erit.

Cum mea te capiet Nemesis, tunc spicula tende

      Aurea per nostrum facta cruenta iecur.

Iamque vale capitique tuo mea musa corollam

10

      Texuit aeternum quae tibi munus erit.