Genologia poetae

Interpres legum Romaeus dis genuit me;

      Quae peperit mater Bartholomaea fuit.

Frater erat Gabriel, qui funere mersus acerbo est.

      Vix ego te novi, bella Maria soror.

5

Orta deo placuit Lucretia sponsa tonanti:

      Illa fuit primo rapta puella die.

Ianiusto Ianfrancisco ne vivere lustrum

      Contigit, o superis lilia nata polis.

Vltimus e tanto defluxi sanguine fratrum,

10

      Mox datus Aoniis erudiendus aquis.

Hic me Socratico praestans sermone Guarinus

      Edocuit, Borso tunc duce Ferrariae.

Clara Chrysoneo sata sanguine nupsit amanti,

      Et duo nos caelo spiritus unus alit.

15

Ioannes princeps et gloria celsa Tridenti

      Me vocat, ut lauri tempora nostra beent.

Ibimus: o nostris, superi, aspirate camenis,

      Et date me domino posse placere meo.

Vos comites properate deae: nos plectra movemus.

20

      Caesar, eris nostrae fabula prima viae.